15 наурыз күні қазақстандықтар республикалық референдумға қатысып, жаңа Конституция жобасын қолдау немесе қолданыстағы редакцияны сақтау жөнінде таңдау жасайды. Бұл мәселе қоғамда көптеген сауал туындатып отыр. Сондықтан ресми әрі нақты ақпарат беру маңызды.

Осы мақсатта ҚР Оқу-ағарту министрлігіне қарасты Ұлттық ғылыми-практикалық дене тәрбиесі орталығының қызметкерлері түсіндіру бағытындағы Zoom-конференция ұйымдастырды. Онлайн-кездесуге еліміздің барлық 20 өңірінен дене шынықтыру пәні мұғалімдері, әдіскерлер және өңірлік орталықтардың мамандары қатысты.

Кездесу барысында Конституцияның жаңа жобасы мен қолданыстағы нұсқасының негізгі айырмашылықтары кеңінен талқыланды. Енгізілген түзетулер, конституциялық институттардың қызметіндегі өзгерістер және олардың қоғамдық өмірдің түрлі салаларына ықпалы жан-жақты түсіндірілді. Әсіресе педагогикалық қауымдастықты алаңдатқан практикалық мәселелерге ерекше назар аударылды.

Қатысушылар өздерін толғандырған сауалдарын қойып, нақты әрі мазмұнды жауап алды. Ашық диалог форматында өткен кездесу жаңа жобаның негізгі қағидаларын кәсіби ортада талқылауға мүмкіндік берді.

Мұндай түсіндіру жұмыстары азаматтардың құқықтық сауаттылығын арттыруға және саналы шешім қабылдауына негіз болады.