2024 жылғы 28 мамырда Астана қаласында ҚР ҚК «Ұлттық әскери-патриоттық орталығы» РММ базасында «Алғашқы әскери және технологиялық дайындықты ұйымдастырушы оқытушылардың кәсіби құзыреттілігін дамыту» тақырыбы бойынша семинар мен ғылыми-әдістемелік конференцияның қорытындысын шығаруға қатысты дөңгелек үстел өткізілді.

ҚР Қорғаныс министрлігі «Әскери-стратегиялық зерттеулер орталығы» АҚ мен ҚР Оқу-ағарту министрлігі «Ұлттық ғылыми-практикалық дене тәрбиесі орталығы» РМҚК ұйымдастыруымен өткізілген дөңгелек үстелде орта, техникалық және кәсіптік білім беру ұйымдарында Алғашқы әскери және технологиялық дайындық пәнінен сабақ беретін педагогтердің кәсіби біліктілігін арттыру курсын ұйымдастыру және өткізудің маңыздылығы жан-жақты талқыланды.

Кеңес отырысында білім алушыларға әскери-патриоттық сапалы тәрбие берумен қатар, әскери жаттығуларды орындау барысында қимыл-қозғалыс икемділігі, жылдамдық, дәлдік секілді олардың физикалық дайындығының болуы да маңызды фактор болып табылатындығы айтылды.

Теориялық білім мен практикалық шеберлікті меңгерумен қатар, уақыт қажеттілігіне сай цифрлық ресурстарды пайдалану дағдыларын жетілдіру мәселесі де дөңгелек үстел қатысушыларының назарынан тыс қалмады.