ҚР Оқу-ағарту министрлігінің кеңейтілген алқа отырысында балалардың құқықтарын қорғау саласындағы мемлекеттік саясатты іске асыру мәселелеріне ерекше назар аударылды.

Мемлекет басшысының тапсырмасымен алғаш рет 2026-2030 жылдарға арналған «Қазақстан балалары» тұжырымдамасы әзірленді. Құжат балалық шақ мәселелеріне бірыңғай көзқарас қалыптастырып, қолданыстағы шаралар мен бағдарламаларды тұтас жүйеге біріктіреді.

«Тұжырымдаманың негізгі мақсаты – әрбір баланың білім алу, денсаулығын сақтау, әлеуметтік қорғалу және отбасында тәрбиелену құқықтарын қамтамасыз ететін жүйелі әрі үйлестірілген тәсілді қалыптастыру. Осы мақсатқа қол жеткізу үшін құжат балалардың қауіпсіздігін күшейтуге, психологиялық және әлеуметтік қолдау жүйесін жетілдіруге, сондай-ақ ведомствоаралық үйлестіруді нығайтуға бағытталған. Қазақстан балалардың құқықтарын қорғауға арналған мақсатты ұлттық стратегиясы бар санаулы мемлекеттердің бірі», - деді Жұлдыз Сүлейменова.

Бүгінде елімізде 6 902 492 бала тұрады, бұл халық санының үштен бірін құрайды. Соңғы 10 жылда балалар саны шамамен 1,5 миллионға артты. Бұл инфрақұрылым мен қолдау жүйесін одан әрі нығайтуды талап етеді.

Мемлекет басшысының тапсырмаларын іске асыру аясында балалардың құқықтарын қорғауды күшейтуге және зорлық-зомбылыққа нөлдік төзімділік принципін енгізуге бағытталған 10 заң қабылданды. 2025 жылы заңнамаға балалардың құқықтарын бұзғаны үшін әкімшілік жауапкершілікті бекітетін қосымша өзгерістер енгізілді. 237 мыңнан астам бала психологиялық-медициналық-педагогикалық қолдаумен қамтылған, оның ішінде шамамен 17 мың бала үйде білім алады. Білім беру ұйымдарында 3,8 мың педагог-ассистент және 10 мыңнан астам арнайы педагог жұмыс істейді.

Балалардың тамақтануы мен санитариялық қауіпсіздігіне ерекше көңіл бөлінуде. Мектептегі тамақтанудың жаңа стандарты енгізіліп, өнім сапасы мен санитариялық талаптардың сақталуына бақылау күшейтілді. Мектепке дейінгі білім беру саласында «Ақша балаға беріледі» қағидаты бойынша ваучерлік қаржыландыру енгізілді. Бұл тетік кезекті екі есеге қысқартуға және 21 млрд теңгеден астам қаражатты үнемдеуге мүмкіндік берді. Елімізде 11 900 балабақша жұмыс істейді, онда шамамен 1 миллион бала тәрбиеленуде, ал мектепке дейінгі сыныптарда 163 мыңнан астам бала білім алуда.

«Қазақстан балалары» тұжырымдамасын іске асыру балалар саясатын жүйелі дамытуға және әрбір бала үшін тең мүмкіндіктер қалыптастыруға бағытталған.

2026 жыл Мемлекет басшысының бастамасымен Цифрландыру және жасанды интеллект жылы болып жарияланды. Осы стратегиялық бағыт аясында Орталықта барлық негізгі үдерістерді қамтитын және ҰҒПДТО қызметін бірыңғай цифрлық форматқа көшіруге бағытталған жүйелі жұмыс жүргізілуде.

Қазіргі уақытта екі негізгі бағытты қамтитын арнайы цифрлық платформа әзірленіп жатыр.

Бірінші бағыт — педагогтердің біліктілігін арттыру курстары. Платформа педагогтерді толық қамтып, олардың цифрлық профилін қалыптастыруға, біліктілік деңгейін, оқыту сапасын бағалауға және кәсіби дамудың ашық әрі тиімді жүйесін құруға мүмкіндік береді.

Екінші бағыт — спорттық жарыстарды ұйымдастыру және өткізу. 2026 жылға жоспарланған 115 спорттық жарыс аясында қатысушыларды тіркеуден бастап, әр жарыстың төрт кезеңін өткізуге дейінгі барлық процесс толықтай цифрландырылатын болады.

Жүйе барлық қатысушы үшін ашықтықты, қолжетімділікті және тең мүмкіндіктерді қамтамасыз етеді. Әрбір спортшы мен педагог жарыстардың өту барысы, нәтижелері және қорытынды көрсеткіштері туралы ақпаратты онлайн форматта еркін ала алады.

Цифрлық шешімдер мен жасанды интеллект құралдарын енгізу басқару тиімділігін арттырып, үдерістердің ашықтығын қамтамасыз етуге және елдегі мектеп спортының сапалы дамуына серпін береді.

 ҰҒПДТО-да сыбайлас жемқорлыққа қарсы іс-қимылға бағытталған семинар өтті

2025 жылғы 25 желтоқсанда Қазақстан Республикасы Оқу-ағарту министрлігінің «Ұлттық ғылыми-практикалық дене тәрбиесі орталығы» РМҚК-де сыбайлас жемқорлыққа қарсы іс-қимыл талаптарын сақтау мәселелеріне арналған ішкі семинар өткізілді.

Семинардың негізгі мақсаты – ұжым арасында сыбайлас жемқорлыққа қарсы мәдениетті қалыптастыру, құқықбұзушылықтардың алдын алу шараларының тиімділігін арттыру және бұл бағыттағы ортақ жауапкершілікті нығайту.

Іс-шара барысында қызметкерлер сыбайлас жемқорлыққа жол беретін негізгі себептер мен алғышарттарды, оларды жою жолдарын, сондай-ақ мекемеде қабылданып жатқан нақты шараларды талқылады. Сонымен қатар, сыбайлас жемқорлық фактілері орын алған жағдайда, кәсіпорын басшылығын дер кезінде хабардар етудің маңыздылығы атап өтілді.

Семинар барысында орталықтың 2025 жылы атқарған алдын алу жұмыстары баяндалып, келесі жылға арналған - 2026 жылға арналған сыбайлас жемқорлыққа қарсы іс-қимыл жоспары таныстырылды.

Орталықта бұл бағыттағы жұмыстар жүйелі түрде жалғасады.

Ұлттық ғылыми-практикалық дене тәрбиесі орталығының бас директоры Арман Ташметов өңірлік орталықтардың басшылары мен өкілдерінің қатысуымен қорытынды кеңес өткізді. Жиын барысында 2025 жылы атқарылған жұмыстардың нәтижелері сараланып, алдағы кезеңге арналған жоспарлар айқындалды.

Атап айтқанда, биыл алғаш рет Ұлттық мектеп лигасының финалистері демеушілер тарапынан арнайы сыйлықтармен марапатталды. Сондай-ақ 17 спорт федерациясымен ынтымақтастық меморандумдарына қол қойылып, олардың әрқайсысымен балалар мен жастар арасында дене белсенділігін дамыту, мектептерде спорт секцияларын ашу және спорт залдарын қажетті құрал-жабдықтармен — татами, футбол доптары және өзге де спорттық құралдармен қамтамасыз ету бағытында жүйелі жұмыс жүргізілуде.

Кеңес барысында дене шынықтыру пәні мұғалімдерінің біліктілігін арттыру мәселесіне де ерекше назар аударылды. Ақылы негізде оқудан өткен педагогтер алғаш рет бір мезетте үш сертификатқа ие болды: Орталықтан және екі салалық спорт федерациясынан. Бұл олардың тиісті спорт түрлері бойынша жаттықтырушы санатын растауына мүмкіндік берді.

Кездесу барысында халықаралық ынтымақтастықты кеңейту, біліктілікті арттыру курстарын жетілдіру, оқушыларға арналған мектептік дене жаттығу кешенін толықтыру, сондай-ақ өңірлердегі спорт залдарының материалдық-техникалық базасын нығайтуға қатысты ұсыныстар айтылды. Барлық ұсыныстар назарға алынып, алдағы жұмыста пысықталатын болады.

Жиын соңында Арман Ташметов әріптестерін бірлесіп, үйлесімді жұмыс істеуге шақырып, білім беру жүйесінде дене шынықтыру мен спортты дамытудағы ортақ жауапкершілікті атап өтті.