2024 жылғы 27 қыркүйекте орта білім беру ұйымдарының дене шынықтыру педагогтеріне арналған біліктілікті арттыру курсы аяқталды.

Ұлттық ғылыми-практикалық дене тәрбиесі орталығы ұйымдастыруымен «Дене шынықтыру педагогінің кәсіби құзыреттілігін дамыту» тақырыбында Алматы, Шымкент қалаларында және Ақмола, Жамбыл, Қостанай, Солтүстік Қазақстан, Түркістан облыстарында өткізілген 80 сағаттық курсқа 353 тыңдаушы қатысты.
Тыңдаушылар орта білім беру ұйымдарында оқу процесін ұйымдастырудың заманауи тәсілдерін меңгерді.
Әріптестер дене шынықтыру пәнінде жасанды интеллектті пайдалануға ерекше көңіл бөліп, оқушылар үшін қызықты әрі тиімді етуге көмектесетін инновациялық әдістерді зерттеді және өзара тәжірибе алмасты.

Ұлттық ғылыми-практикалық дене тәрбиесі орталығының ұйымдастыруымен 23 қыркүйекте Ақтөбе, Алматы, Атырау, Батыс Қазақстан, Жетісу, Қызылорда, Маңғыстау және Павлодар облыстарында басталған курсқа орта білім беру ұйымдарының 496 дене шынықтыру педагогі қатысуда.

Курс бағдарламасы 7 модульден тұрады. Олардың әрқайсысы дене шынықтыру пәні бойынша білімді тереңдетуге және практикалық дағдыларды дамытуға бағытталған.

Орталықтың білікті тренер-лекторлары тыңдаушыларға
-оқытудың заманауи әдістері: оқытудың инновациялық тәсілдерін зерттеу;
-спорт психологиясы: оқушыларды ынталандыру және сабақта жағымды ахуал туғызу;
-қозғалыс белсенділігін талдау: заманауи құралдарды пайдалана отырып, оқушылардың дене дайындығын бағалау;
-инклюзивті білім беру: ерекше қажеттіліктері бар балаларды оқыту тәсілдері;
-денсаулық сақтау технологиялары: оқушылардың денсаулығын жақсартуға арналған тәжірибелерді жүзеге асыру;
-ІТ құзыреттілік: сабақтардың тиімділігін арттыру үшін қосымшалар мен платформаларды пайдалану тақырыптары аясында педагогтердің кәсіби шыңдалуына арналған теориялық/практикалық білімдерімен бөлісетін болады.