«ҰЛТТЫҚ МЕКТЕП ЛИГАСЫ» АЯСЫНДА «АЛТЫН ДОП» РЕСПУБЛИКАЛЫҚ ЖАРЫСЫ ӨТТІ

Киелі Қызылорда қаласында 7-14 шілде күндері баскетболдан «Алтын доп» республикалық жарысы өтті. Бұл жарыс «Ұлттық мектеп лигасы» аясында ұйымдастырылып, Қазақстанның түкпір-түкпірінен келген 9-11 сынып оқушыларын жинады.

Қызылорда қаласындағы «Мұз айдыны» спорт кешенінде өткен сайысқа 11 команда, 120 оқушы келді.

1. Қызылорда облысы - 12
2. Маңғыстау облысы - 12
3. Атырау облысы - 12
4. Астана қаласы - 12
5. Ақтөбе облысы - 12
6. Шымкент қаласы - 8
7. Түркістан облысы - 12
8. Алматы - 12
9. Қарағанды облысы - 9
10. Жамбыл облысы - 12
11. Алматы болысы - 12.

Жарыс кезінде оқушылар өз шеберліктерін көрсетіп, командалық рухты нығайтты. Барлық қатысушыларға үлкен алғыс білдіреміз және келешекте жаңа жетістіктерге жетулерін тілейміз!

АРГЕНТИНА АМЕРИКА КУБОГІНІҢ ИЕГЕРІ АТАНДЫ

Теңбіл доп додасы мұхиттың арғы жағындағы елдер үшін де бәсі биік спортқа айналған.  АҚШ-та өткен Copa America 2024 - додасының биылғы жеңімпазы ретінде Колумбия құрамасын ұтқан Аргентиналықтар танылды. Матч барысында екі команда да өте сақ қимылдап, қарсыластарының қателесуін күтті. Ойынның негізгі уақытында тең тарқасқан қарсыластар қосымша уақытта барын салуға тырысты. Нәтиже де көп күттірмеді. Матчқа тыңнан қосылған Интер клубының шабуылшысы Лаутаро Мартинес 96 минутта гол соғып, командасына кубок әперді.

Финалдық матчқа дейін аргентиналықтар топтық кезеңде Канада, Чили және Перу құрамаларынан озып шықса, ширек финалда Эквадор құрамасын пенальти сериясынан, жартылай финалда Канада құрамасын (бір топта ойнаған) жеңген еді.

Сөйтіп, құрамында Лионель Мессидей даңқты аяқдопшысы бар аргентиналық ұжым 16-мәрте бас бәйгені еншілесе, команданың шабуылшысы Лаутаро Мартинес турнирде 5 гол соғып үздік мерген атағын жеңіп алды.

ГИМНАЗИЯДА КӨРКІ - ТЕҢБІЛ ДОП
Алатаудың бөктеріндегі Алматы шаһарында жасөспірімдер сынға түсіп жатыр. Аладопты жандарына серік еткен 16-18 жастағы өрендеріміз XII Жазғы гимназиада аясында мини-футбол сайысының көрігін қыздыруда.
Жас спортшыларымыздың шеберлігін шыңдап, достық қарым-қатынастарын нығайтуды мақсат еткен сайыс ұлдар және қыздар арасында өтуде. Бәсекеге бірқатар облыстардан жасөспірімдер келген.
Ұлдар арасында:
1. Алматы
2. Ақтөбе облысы
3. Атырау облысы
4. Маңғыстау облысы
5. Қызылорда облысы
6. Жамбыл облысы
7. Түркістан облысы

Қыздар арасында:
1. Алматы
2. Маңғыстау облысы
3. Қызылорда облысы
4. Ақтөбе облысы
5. Жамбыл облысы
Доп додасы жаһан жұртшылығының сүйіп көретін бәсекесі десек, құрлықтық аламанда сынға түсетін спортшылар да осындай сайыстардан шыңдалып шығары сөзсіз. Бұл сайыстар жас спортшылардың болашақта үлкен жетістіктерге жетуіне серпін береді. Бәлкім, қазақ құрамасының Ямалы мен Никосы осы сайыста жүрген шығар.

Барлық қатысушыларға сайыста сәттілік тілейміз. Жарыс 19 шілдеге дейін жалғасады.

ИСПАНИЯ ҚҰРАМАСЫ 4 ДҮРКІН ЕУРОПА ЧЕМПИОНЫ АТАНДЫ

Футболдан Еуропа Чемпионатының финалында Англия ұлттық құрамасын 2:1 есебімен жеңген Испания құрамасы өз тарихында төртінші мәрте Еуропа чемпиондары атанды. Осыған дейін Испания құрамасы 1964, 2008, 2012 жылдары чемпиондық атаққа қол жеткізген болатын.

Гарет Саутгейт баптайтын ағылшындар екі Еуропа Чемпионатының финалында жеңіліс тауып отыр. Тұманды Альбион елінің құрамасы 2020 (2021) жылы Италия құрамасынан ойын соңындағы пенальтиден ұтылып, күміс жүлдені қанағат тұтты.

Германия астанасында ұйымдастырылған финалдық ойынның алғашқы жартысында есеп ашылмай, 47-минутта Нико Уильямс Ламин Ямальдің пасын кәдеге жаратып есеп ашқан еді. Алайда, 74-минутта Коул Палмер Джуд Беллингемнің нәтижелі пасынан кейін есепті теңестіріп кетті. Одан кейін 87-минутта Мигель Оярсабаль жеңіс голын соғып командасын алға шығарды. Ағылшын құрамасы жанталаса қимылдағанымен бұл есепті өзгертуге шамалары жетпеді. Осылайша Испания құрамасы Еуропаның 4 дүркін үздігі атанған жалғыз құрама болды.

Чемпионаттың нәтижесі бойынша Манчестер Сити командасында ойнайтын испандық жартылай қорғаушы Родри турнирдің үздік ойыншысы атанса, 17 жасқа енді толған Ламин Ямаль турнирдің үздік жас ойыншысы болды. Ал, үздік сұрмергенге тиесілі жүлдеге Дани Ольмо ие болды.